Kunning

Aftur í ár bjóða vit teir væl umtóktu bóka-jólakalendararnar á bókasavninum. Vit eru komin inn í november, og nú er tíð til at bíleggja tykkara kalendara. Tað er ókeypis og ómakaleyst.

Læn 24 bøkur – eina til hvønn dag fram til jóla. Ella kanska 12 bøkur, so ein nýggj bók er til annan hvønn dag? Ella 4 bøkur, so 1 bók er um vikuna? Nógvir møguleikar eru, og tað er púra upp til tykkum hvat tit ynskja. Teimum heilt smáu børnunum dámar ofta væl at lesa somu bókina aftur og aftur - og børnini í eldra endanum skulu kanska hava eina bók sum skal lesast yvir tveir dagar.

Jólakalendarin er ein frálíkur máti at gera okkurt hugnaligt og gott saman við børnunum í jólamánaðinum. At lesa saman við børnunum skapar hugna, gleði og nærveru - og tað er akkurát hetta sum okkum mangan leingist eftir um jóltíðirnar.

Vit seta jólakalendaran saman sum tit ynskja, alt eftir aldri og áhugamálum hjá børnunum. Tit eru sjálvandi eisini vælkomin inn sjálvi at velja tykkum bøkurnar. Vit hjálpa fegin. Nógvir ansingarstovnar hava eisini umbiðið hendan væl umtókta bóka-jólakalendaran.

Ring ella skriva til okkum, og so siga vit frá tá jólakalendarin er klárur. Vit pakka eisini bøkurnar inn í gávupappír og avíspappír, um tit ynskja tað. Til ber at avheinta kalendaran á Skála bókasavni ella á Bókasavninum við Løkin.

Tlf. 237088
teldupost: lokin@lokin.fo
ella skriva til Bókasavnið við Løkin á facebook

Vit gleða okkum at hoyra frá tykkum - og vit heita á foreldur og ommur og abbar um at vera í góðari tíð. Í fjør var bóka-jólakalendarin so væl umtøktur, at hillarnar við myndabókum vóru so gott sum tómar tá jólini vóru í hondum.