Kunning

Nú er tíðin aftur komin at hugsa um jólakalendara til børnini
Tit kunnu aftur í ár læna ein bókakalendara ókeypis og ómakaleyst frá bókasavninum. Læn 24 bøkur – eina til hvønn dag fram til jóla. Soleiðis hava tit ta hugnaligu og góðu løtuna saman hvønn dag í jólameldrinum
Vit seta jólakalendaran saman sum tit ynskja, alt eftir aldri og áhugamálum hjá børnunum. Ein møguleiki er eisini at velja 4 bøkur - eina til hvønn dag í advent! Eisini eru summi sum velja 12 bøkur - soleiðis kunnu tit geva bøkur annanhvønn dag, og okkurt annað hinar dagarnar. Hetta riggar eisini væl til smærru børnini, tí teimum dámar sera væl at lesa somu bøkurnar aftur og aftur. Tit eru sjálvandi eisini vælkomin inn sjálvi at velja tykkum bøkurnar. Nógvir ansingarstovnar hava eisini umbiðið hendan vælumtókta bóka-jólakalendaran.

Ring ella skriva til okkum, og so siga vit frá tá jólakalendarin er klárur. Vit pakka eisini bøkurnar inn í pappír, um tit ynskja tað. Til ber at avheinta kalendaran á Skála bókasavni ella á Bókasavninum við Løkin

Tlf. 237088

teldupost: lokin@lokin.fo

ella skriva til Bókasavnið við Løkin á facebook

Vit gleða okkum at hoyra frá tykkum. Í fjør var bóka-jólakalendarin so væl umtøktur, at hillarnar við myndabókum vóru so gott sum tómar tá jólini vóru í hondum. Hetta er 5. ár at vit bjóða hendan jólakalendaran, og áhugin økist fyri hvørt ár.

Góðan morgun Føroyar var og vitjaði bókasavnið - til ber at lurta her - uml. 11. min inn í sendingina