Kunning

Í gjár bleiv Lesaravirðislønin hjá Føroysku bókasøvnunum handað Vónbjørt Vang, fyri bókina "Svørt orkidé", á Landsbókasavninum.

Tað var Oyvør Dam Jacobsen, leiðari á Bókasavninum við Løkin í Runavík sum handaði virðislønina. Í røðuni segði Oyvør m.a. at:

Svørt orkidé er ein lítil og lítillátin bók at síggja til, men fer so vítt og djúpt sum tað yvirhøvur ber til. Evnið er so grundleggjandi innhugsið og persónligt – og samstundis so stórt, organiskt og samantvunnið í kosmos.
Hesin móðurkærleikin sum gevur okkum alla styrki í heiminum, eina styrki sum kann hvørva ella implodera upp á eitt sekund, og sum er bundin í hetta menniskjað sum vit ikki kunnu, skulu ella sleppa at hjálpa altíð.
Eg haldi at júst hetta ger at hetta verkið røkkur so víða – vit skilja beinanvegin hvat er uppá spæl, og liva okkum inn í søgugongdina alt fyri eitt. Vit fylgja mammuni í undirheimin og út í urtagarðin, aftur í tíð og fram í tíð. Vit fara niður í moldina við henni og koma uppaftur eisini. Her verða sett orð – vandamikil orð, møguliga – á tað hjálparloysi og tann óttan sum er ein sáttmálabundin fylgisveinur hjá kærleikanum.

Hjartaliga tillukku Vónbjørt Vang!

Øll røðan kann lesast her Landsbókasavnið